Pretoria Sakekamer doen ‘n beroep om hervormings in Tshwane Metroraad se finansiële bestuur en dienslewering

Die Pretoria Sakekamer, wat die besigheidsgemeenskap van Tshwane verteenwoordig, doen 'n dringende beroep op die Tshwane Metroraad om hervormings in finansiële bestuur, dienslewering en regulatoriese doeltreffendheid te implementer, en sodoende beleggersvertroue te herstel en 'n stabiele ekonomiese omgewing te verseker.

Tydens die openbare deelnameproses oor die Stad se 2023/24 Jaarverslag, het Pretoria Sakekamer erkenning gegee aan vordering in bestuur, maar beklemtoon dat belangrike uitdagings steeds voortduur wat ‘n direkte impak op sakeondernemings in die metro het.

Finansiële stabiliteit en verantwoording

Die sakegemeenskap neem kennis dat daar nie permanente Artikel 56-bestuurders tot aan die einde van die eerste kwartaal in diens was nie, wat besluitneming en dienslewering beïnvloed het.

Nietemin prys Pretoria Sakekamer die Stadsbestuurder en sy span vir hul proaktiewe hantering van finansiële bestuur. Anders as vorige jare, is alle onreëlmatige uitgawes vir die finansiële jaar vrywillig geïdentifiseer, verklaar en hanteer in ooreenstemming met munisipale wetgewing, pleks daarvan om dit tydens die ouditproses te ontdek.

Verder het die Ouditeur-Generaal bevind dat die politieke leierskap aktief betrokke was by finansiële oorsig en ouditprosesse, wat die politici se toegewydheid aan deursigtigheid en verantwoording weerspieël.

Dienslewering en infrastruktuurkwessies

Ten spyte van sekere verbeterings, bly onbetroubare elektrisiteits- en watervoorsiening, verswakte paaie en ondoeltreffende vullisverwydering groot hindernisse vir besighede in Tshwane. Gereelde kragonderbrekings en watertoevoerprobleme bedreig bedrywighede, verhoog bedryfskoste en ontmoedig belegging.

As sulks, versoek die Sakekamer die Stad om infrastruktuurinstandhouding en -beleggings te prioritiseer om 'n betroubare sake-omgewing te verseker.

Regulatoriese doeltreffendheid en burokrasie

Administratiewe vertragings belemmer steeds besigheidsgroei. Die Sakekamer doen 'n beroep op die Stad om besigheidslisensiëring, soneringsgoedkeurings en verkrygingsprosesse te stroomlyn om vertragings en koste te verminder.

Konsekwente en regverdige toepassing van munisipale verordeninge is ook noodsaaklik vir 'n voorspelbare en besigheidsvriendelike omgewing.

Veiligheid en infrastruktuurbeskerming

Stygende misdaad, vandalisme van infrastruktuur en grondbesettings hou ernstige risiko’s in vir stabiliteit in. Die Sakekamer doen ‘n beroep om sterker publiek-private veiligheidsvennootskappe en verhoogde wetstoepassing in besigheidsentrums om bates te beskerm - en 'n veilige bedryfsomgewing te verseker.

Ekonomiese groei en besigheidsondersteuning

Alhoewel die Sakekamer die Stad se beleggingsinisiatiewe erken, is meer direkte ondersteuning vir besighede nodig.

As sulks bepleit ons belastingaansporings om werkskepping aan te moedig, uitgebreide vaardigheidsontwikkelingsprogramme wat aangepas is by bedryfsbehoeftes, en groter toegang tot munisipale verkrygingsgeleenthede vir kleinsakeondernemings.

Ten slotte bly die Pretoria Sakekamer toegewy aan samewerking met die Stad om ekonomiese herstel en 'n florerende sake-omgewing te verseker. Tog is dringende aksie nodig om die metroraad se finansies te stabiliseer, dienslewering te verbeter en 'n regulatoriese raamwerk te skep wat besigheidsontwikkeling ondersteun.

Die Stad word versoek om daadwerklik op te tree om hierdie noodsaaklike hervormings te implementeer. Sonder onmiddellike en volgehoue verbeterings, sal besighede aanhou sukkel met onsekerheid, wat ekonomiese groei en werkskepping in Tshwane in gevaar stel.