Action SA se wegdraai 'n ernstige bedreiging vir besighede in Pretoria

Pretoria Sakekamer neem met kommer kennis van onlangse uitsprake deur Action SA se president, Herman Mashaba, dat die party oorweeg om die veelparty-koalisie in die Tshwane-munisipaliteit te verlaat. Dit sal vernietigend vir besigheid in Pretoria wees.

Dit is duidelik dat Herman Mashaba vasbeslote is om met die ANC, EFF en ander kleiner partye saam te span om Cilliers Brink as uitvoerende burgemeester te verwyder, ondanks die feit dat die regerende koalisie aansienlike vordering gemaak het teen die korrupsie en wanadministrasie wat Pretoria al dekades lank teister.

Sedert sy aanstelling in Maart 2023, was Brink eerlik en openhartig oor die Tshwane-bestuur se werksaamhede. Sy versoeke aan die private sektor om saam met die stad te werk om ‘n omkeerstrategie te implementeer, is met groot entoesiasme deur die sakegemeenskap verwelkom, en die Pretoria Sakekamer het gehoor gegee aan daardie versoek.

Sedert ons stigting is ons aan die voorpunt om ons lede en die sakegemeenskap in die algemeen te mobiliseer om hande te vat met die stad se administrasie, in ooreenstemming met ons mandaat om Pretoria te herbou en dit as 'n wêreldklas sake-sentrum  te vestig teen 2050.

Indien Mashaba sy dreigemente deurvoer en by die ANC se sogenaamde regering van plaaslike eenheid aansluit, sal die Tshwane-munisipaliteit nie eens die basiese dienste kan lewer nie.

Daar is 'n ou Afrika-spreekwoord wat lui: “Wanneer olifante baklei, is dit die gras wat ly". Ons is oortuig dat Mashaba ou politieke koeie in Pretoria opgrawe ten koste van die stad, sy inwoners en besighede.

Die Pretoria Sakekamer glo in konstruktiewe betrokkenheid, en doen ‘n beroep op sakelui en inwoners om met hul plaaslike Action SA verteenwoordigers en raadslede in verbinding te tree, en hul kommer oor die dreigende Action SA onttrekking uit die veelparty-koalisie uit te spreek.

Ons doen ook ‘n beroep op Mashaba en partyvoorsitter Michael Beaumont om met die leierskap van die veelparty-koalisie te kommunikeer ingevolge die koalisie se interne geskilbeslegtingsproses en dan ‘n formele aankondiging oor hul posisie te maak.

Pretoria se inwoners en sakegemeenskap verdien om die vrugte van die vordering wat ons gemaak het sedert die veelparty-koalisie in November 2021 ingehuldig is, te pluk.