ActionSA kies korrupsie as hy veelparty-alliansie versaak – Pretoria Sakekamer

Pretoria Sakekamer het vandag ActionSA se kortsigtige en onverantwoordelike optrede veroordeel, om weg te breek van die veelparty-alliansie wat gesorg het vir ‘n nuwe, werkende Tshwane-bestuur. Die sakekamer meen dié stap dreig om die goeie werk wat die afgelope twee jaar deur die huidige Tshwane-bestuur vermag is, ongedaan te maak en het ‘n beroep gedoen op die party om nie toe te laat dat nasionale politieke speletjies inmeng by plaaslike dienslewering nie.

“Hoewel Pretoria Sakekamer gewoonlik wegbly van partypolitiek is die huidige situasie vir sakelui in die stad ‘n onaanvaarbare wending. Onder die ANC-bewind is reuse korrupsieringe op elke diensleweringsvlak op die been gebring en dat ActionSA wegbreek van die groep wat hierdie korrupsie begin ontbloot en aanspreek het, spreek boekdele,” sê Fergus Ferguson, voorsitter van Pretoria Sakekamer.

Vir Pretoria se ekonomie om te groei, het ons stabiele, effektiewe en deursigtige dienslewering nodig. Sakelui dring aan op stabiliteit sodat hulle op ekonomiese groei kan fokus.