Ter Nagedagtenis: Dawie “Zottie” de Villiers; ’n Stigtersfiguur wat bly voortleef in ons nalatenskap

Die Pretoria Sakekamer het met groot hartseer verneem van die skielike afsterwe van Dawie “Zottie” de Villiers - ’n stigterslid, lojale vriend en merkwaardige visionêre leier - wat op 29 Mei oorlede is.

MidCity Eiendomsgroep stigter

Zottie was ’n legende in sy eie tyd. As stigter van die MidCity Eiendomsgroep in 1983 het sy entrepreneurskap en visie die grondslag gelê vir ’n toonaangewende onderneming in Pretoria. Dieselfde gees van pionierskap het hy ook na die Pretoria Sakekamer gebring, waar sy geloof in gemeenskap en Afrikaanse sakeleierskap ’n diepgaande bydrae tot ons ontstaan en groei gemaak het.

Hy het elke geleentheid verryk - veral ons gholfdae - met sy droë sin vir humor, onvergeetlike jagstories en kosbare lewens- en besigheidslesse wat hy so vrylik gedeel het.

Rus in vrede

Aan sy geliefdes betuig ons ons opregte meegevoel. Mag julle troos vind in die nalatenskap wat hy laat, en in die baie lewens wat hy op ’n unieke manier geraak het.

Rus in vrede, Zottie. Jy sal onthou word met diepe waardering en opregte liefde.