Die Pretoria Sakekamer is hier! Wees saam met ons rentmeesters van die stad!

Meer as 300 sakelui van regoor Pretoria het op 16 Maart 2023 die bekendstelling van Pretoria Sakekamer volgepak.

Waarheen is Pretoria Sakekamer oppad?

Pretoria Sakekamer gaan Pretoria herbou en vestig tot ‘n wêreldklas sakesentrum. Ons gaan dit doen ondanks staatsverval en selfstandig van die politiek. Die kuur vir munisipale- en infrastruktuurverval is selfstandige sakelui.

Wat is nodig hiervoor? In twee woorde: Verantwoordelikheid en verantwoordbaarheid.

Verantwoordelikheid

Ons, die sakelui van Pretoria, het vir té lank ons verantwoordelikheid om betrokke te raak by die “sake” van die stad versaak. Ons het verval in die heersende kla- en blameerkultuur. Ons heil lê beslis nie in politieke partye nie, maar eerder in die hande van entrepreneurs wat die kuns vervolmaak om uitdagings en probleme in winsgewende en volhoubare sakegeleenthede te omskep.

Stap een is om weer ons verantwoordelikheid op te neem. Wat rondom ons gebeur - die dinge wat die sakeomgewing vir ons ondernemings ongunstig maak, ís óns saak!

Dit gesê, bly die regulatoriese raamwerk, diensleweringstrukture en fisiese infrastruktuur (soos water, krag, padinfrastruktuur), wat die hoekstene wat ‘n gunstige sakeomgewing in Pretoria moet skep, in beheer van die stadsbestuur. Daarom moet sakelui wat verantwoordelikheid neem, ook organiseer. Onder die Pretoria Sakekamer vestig ons ‘n sterk kollektiewe stem, verenig ons eeue se ondernemingskundigheid en voeg ons hulpbronne saam om ‘n sterk operasionele vermoë te skep rentmeesters van die Pretoria sakeomgewing te wees.

Verantwoordbaarheid

‘n Georganiseerde sakegemeenskap onder die Pretoria Sakekamer onderhandel nie met enige politieke party of instelling nie, ons fasiliteer produktiewe samewerking, eis verantwoordbaarheid en beding dat beleide en strukture wat in die pad van ‘n gunstige sakeomgewing staan, hersien word.

Kortom: Wat is Pretoria Sakekamer en wat is dit wat ons wil doen?

Ons snoer ekonomies aktiewe sakelui en ondernemings met sakebelange in Pretoria saam. Ons is ‘n dinkgroep, ‘n doengroep en ‘n drukgroep en ons oproep aan ondernemings in Pretoria is eenvoudig: Wees saam met ons rentmeesters vir die stad.