Gemeenskapsveiligheid in Pretoria: Samewerking en Tegnologie die Sleutel tot ’n Veiliger Stad

Die behoefte aan proaktiewe en inklusiewe veiligheidsinisiatiewe in Pretoria het die afgelope tyd al hoe dringender geword. Tydens Pretoria Sakekamer se netwerkgeleentheid op 24 Julie 2025 het Vryheidsfront Plus-raadslid en voormalige burgemeesterskomiteelid vir gemeenskapsveiligheid, Grandi Theunissen, die sakegemeenskap toegespreek oor die herdefiniëring van gemeenskapsveiligheid deur middel van samewerking en tegnologiese vooruitgang.

In sy toespraak het Theunissen beklemtoon dat veiligheid veel meer behels as die sigbare teenwoordigheid van sekuriteitspersoneel. Dit vereis proaktiewe beplanning, die gebruik van gevorderde tegnologie en kunsmatige intelligensie, asook gesamentlike verantwoordelikheid tussen die publiek en privaatsektor. Hy het ’n voorstel gemaak vir die stigting van ’n gemeenskapsveiligheidsnetwerk wat die openbare sektor, sekuriteitsmaatskappye, ondernemings en noodreaksie-organisasies insluit. Die doel is nie om bestaande strukture te dupliseer nie, maar eerder om elke deelnemer se hulpbronne en vermoëns te vermenigvuldig deur gesamentlike optrede en gedeelde tegnologie.

Theunissen het verwys na die gewelddadige munisipale staking in 2023, toe voertuie afgebrand is, mense geïntimideer is en dienslewering tot stilstand gekom het. ’n Groot uitdaging was dat lede van die metropolisie aan dieselfde vakbond behoort het wat verantwoordelik was vir die staking. “Destyds het ons ’n netwerk van onafhanklike, privaat sekuriteitsmaatskappye saamgestel wat ’n reuse verskil gemaak het om die situasie te stabiliseer,” het hy verduidelik. “Sedert die magsverskuiwing binne die Tshwane-raad het dit net duideliker geword hoe noodsaaklik so ’n netwerk is.”

Die voorgestelde netwerk sal kunsmatige intelligensie benut om misdaadpatrone te identifiseer en voorkom. Tegnologie soos gesigsherkenning en nommerplaatherkenning kan tussen deelnemende partye gedeel word om vinniger en meer doelgerig op noodsituasies te reageer. Pretoria se veiligheidsbehoeftes is omvattend – van infrastruktuur- en landelike beveiliging tot hoofweë, kapings en inbrake. Met gedeelde tegnologie kan die veiligheidsnet wyer en doeltreffender gespan word. Die netwerk sal ook voorsiening maak vir die rapportering van infrastruktuurprobleme wat veiligheid beïnvloed, soos slaggate, straatligte wat buite werking is en foutiewe verkeersligte.

Die inisiatief word beoog as ’n organisasie sonder winsoogmerk. Ondernemings en instansies wat betrokke raak, sal Artikel 18A-belastingsertifikate kan ontvang vir hul bydraes. Volgens Theunissen is die uiteindelike doel om ’n omvattende veiligheidsnetwerk te vestig wat die stad se aantrekkingskrag vir beleggers verhoog en Pretoria omskep in ’n veiliger, meer leefbare stad – alles gedryf buite die staat en in noue vennootskap met die sakegemeenskap en privaatsekuriteit.“

Belegging in veiligheid is belegging in ons stad se toekoms,” het hy afgesluit. “Pretoria kan weer ’n wêreldklas beleggingsbestemming word – mits ons die verantwoordelikheid saam dra.”