top of page

Geslaagde mosie van wantroue 'n terugslag vir Pretoria - Pretoria Sakekamer

Dis met algehele teleurstelling dat die Pretoria Sakekamer moes toekyk hoe maande se goeie werk deur die koalisie binne die Tshwane-bestuur binne 'n oogwink vernietig is deur selfsugtige en onnadekende politici wat demokrasie vir eie gewin gebruik.


'n ANC-faksie onder leiding van Gauteng se premier, Panyaza Lesufi, het 'n strooihalm na Herman Mashaba en Michael Beaumont van ActionSA gegooi en nou is ActionSA van sy goeie guns afhanklik. Dit was 'n desperate poging van ActionSA om provinsiaal relevant te bly te midde van 'n reuse nederlaag in die nasionale verkiesing. Ons glo hulle sal by die volgende plaaslike verkiesings by die stembus vir hulle onverantwoordelike optrede gestraf word.


Wat in Pretoria aan die gebeur is, sal nasionaal ook 'n impak maak. Ons voorsien spanning binne die Regering van Nasionale Eenheid (RNE) en Ramaphosa gaan sy hande volhê om als bymekaar te probeer hou.


"Pretoria Sakekamer is gereed om met mag en mening te doen wat gedoen moet word om te verseker dat sakevertroue in die stad herstel word ten spyte van onderduimse politici. Enige korrupte stappe deur die nuwe Tshwane-bestuur sal met PAIA-aansoeke en forensiese ondersoeke deur ons netwerk van sakelui begroet word en ons sal kiesers vir die volgende munisipale verkiesing help mobiliseer," sê Fergus Ferguson, voorsitter van die Pretoria Sakekamer.


"Sakelui in Pretoria sal hulle nie deur hierdie terugslag laat onder kry nie en is gewoond aan onvoorspelbare omstandighede. Ons het nie 'n keuse as om munisipale risiko's voortaan saam met al die ander uitdagings wat met sake doen gepaard gaan, te bestuur nie. As risiko's ons afgeskrik het, was daar lankal nie meer 'n sakegemeenskap in die stad nie."


"Ons waardeer almal in die koalisie wat beginselvas teen die mosie van wantroue teen Cilliers Brink geveg het vandag. Sakelui sal aanhou om druk toe te pas om deursigtigheid en produktiwiteit van die munisipale bestuur te eis."


Comments


bottom of page