Hoe kan ek my gemeenskap verbeter? Pretoria Sakekamer bespreek gemeenskapsgedrewe inisiatiewe om lewenskwaliteit in stede te verbeter

Pretoria Sakekamer se visie is om Pretoria te herbou en te vestig as ‘n wêreldklas stad. Die stad is egter, nes die meeste dorpe en stede regoor die land, in ‘n spiraal van verval en wanbestuur vasgevang. Die enigste teenvoeter vir die verval is dat gemeenskappe self inspring en doen wat gedoen moet word om die stad te onderhou en te beveilig. Die Pretoria Sakekamer deel graag hoe gemeenskappe deur middel van “Community Upliftment Precincts” (CUPs) en “City Improvement Districts” (CIDs) self hulle gemeenskappe se probleme kan aanpak.

WAT IS ‘N CUP?

‘n Gemeenskapsopheffingsgebied (Community Upliftment Precinct) of CUP, is ‘n 'n formele ooreenkoms wat met die stadsraad aangegaan word om openbare infrastruktuur binne ‘n woon-, sake- en nywerheidsgebied in stand te hou en te verbeter. Nadat die nodige toestemming van die stadsraad verkry is, kan die CUP hulle planne begin implementeer. Lees meer or die CUP sisteem hier.

Dit is belangrik om te verstaan dat ‘n CUP-inisiatief vrywillig is en nie 'n oordrag van munisipale funksies aan gemeenskappe is nie. Die stadsraad sal voortgaan om sy normale munisipale dienste te lewer, soos elektrisiteitsvoorsiening, afvalverwydering, watervoorsiening, sanitasie, verkeerspolisiëring, paaie en straatligonderhoud, ens. Daar bestaan eenvoudig ‘n memorandum van verstandhouding tussen die stadsraad en ‘n gemeenskap oor die uitvoer van spesifieke take en dit vind binne ‘n sterk verhouding met betrokke raadslede plaas.

Hoe werk dit?

-        Gemeenskappe wat in die CUP-inisiatief belangstel, moet met hul wyksraadslede konsulteer om 'n lys van diensuitdagings op te stel.

-        Hierdie lys sal onder die aandag gebring word van die Kantoor van die Stadsbestuurder wat op sy beurt met die betrokke streeksbeamptes sal skakel en 'n vergadering met die gemeenskap sal reël.

-        'n Operasionele plan sal deur die stadsraad saam met die gemeenskap opgestel word en finale goedkeuring sal deur die Kantoor van die Stadsbestuurder verleen word.

Indien ‘n CUP goed funksioneer en die gewenste persentasie van besighede en/of inwoners in ‘n area daartoe instem, kan ‘n CUP in ‘n CID omskep word.

WAT IS ‘N CID?

'n Stadsverbeteringsdistrik (CID) verwys na 'n duidelik gedefinieerde geografiese gebied waarin eiendomseienaars addisionele tariewe bydra om aanvullende munisipale dienste vir daardie spesifieke area te finansier volgens 'n gemeenskapsondersteunde Besigheidsplan wat deur die stadsraad goedgekeur is. Die stadsraad bepaal 'n area as 'n spesiale tariefarea, wat dan as 'n CID funksioneer om die area te verbeter en op te gradeer oor 'n vaste termyn. Lees hier meer oor hoe ‘n CID program werk.

In Pretoria, is die Hatfield CID die bloudruk van ‘n hoogs funksionele CID. Die Hatfield CID is onder meer verantwoordelik vir die paaie, sypaadjies en veiligheid binne die CID.

Hatfield is 'n studentedorp, met sowat 40 000 studente. Die Hatfield CID wil hê ouers moet voel dat hulle kinders veilig is, veral in die aand. Die CID probeer ook die area skoon en dwelm- en alkoholvry te hou. Tukkies is een van die beste universiteite in Suid-Afrika, en is in die top 5 persent in die wêreld, en ons wil graag hê dit moet so bly.  ‘n Nuwe veiligheidstoepassing vir slimfoongebruikers word tans in die CID uitgerol om studente binne minute by te staan in ‘n noodsituasie. Die CID is gelukkig genoeg om ‘n eie polisiestasie in Hatfield te hê en goeie samewerking tussen die partye beteken dat Hatfield nou een van die veiligste omgewings in die stad is.

Vir Pretoria om weer te skitter, benodig ons talle werkende CUPs wat uiteindelik tot CIDs uitgebrei word.