Hoe wyd strek Tshwane se oorbetalings? Pretoria Sakekamer eis antwoorde

Pretoria Sakekamer neem met ernstige kommer kennis dat Pretoria se burgemeester, Nasiphi Moya, ná maande van onsekerheid uiteindelik bevestig het dat sy sowat R270 000 aan die Tshwane-munisipaliteit verskuldig is as gevolg van onregmatige oorbetalings tydens haar vorige diens daar. Hierdie terugbetaling volg nadat sy reeds vroeër ’n bedrag van R10 000 moes terugbetaal het vir ’n internasionale reis wat sy nooit onderneem het nie.

Die feit dat die burgemeester eers ná openbare druk instem om die geld terug te betaal, plaas ernstige vrae oor aanspreeklikheid en die voorbeeld wat aan die stad se inwoners en besigheidsgemeenskap gestel word. Nog meer ontstellend is die vraag wat nou ontstaan: hoeveel ander oorbetalings is in die verlede aan hoeveel werknemers gemaak, en het die Tshwane-munisipaliteit werklik ’n deeglike greep op die omvang van hierdie probleem?

Fergus Ferguson, voorsitter van Pretoria Sakekamer, sê:

“Leierskap beteken om sonder versuim die regte ding te doen. Dit is onaanvaarbaar dat Pretoria se hoogste politieke ampsdraer eers onder druk gebring moet word om onregmatige betalings reg te stel. In ’n tyd waar ondernemings en inwoners swaar dra onder swak dienslewering en buitensporige tariewe, is dit ononderhandelbaar dat die burgemeester self die toon moet aangee van deursigtigheid en integriteit.”

Pretoria Sakekamer doen ’n beroep op die burgemeester om die volle bedrag onverwyld terug te betaal en terselfdertyd die nodige stappe te neem om te verseker dat soortgelyke oorbetalings nie weer kan plaasvind nie. Vir die stad se inwoners en sakegemeenskap is dit ’n kwessie van vertroue: belastingbetalers moet die sekerheid hê dat hul bydraes reg bestuur word.