Mosie van wantroue simptoom van nasionale politiekery - Pretoria Sakekamer

Pretoria Sakekamer het sprake van ‘n mosie van wantroue teen die Pretoria Burgemeester, Cilliers Brink as voortydig bestempel en beskou dit as nasionale politiekery wat nou dreig om die Tshwane-bestuur in die wiele te ry.

“Die huidige Tshwane-bestuur is die afgelope twee jaar besig om ‘n ingewikkelde omkeerstrategie te implementeer. Talle korrupsieneste is in dié tyd ontbloot. Vir sakelui is die suksesvolle implementering van die omkeerstrategie noodsaaklik vir betroubare dienslewering en die deursigtige bestuur van belastinggeld. Enige party wat die plan deur onmotiveerbare mosies in die wiele ry, sal aanspreeklik gehou word vir enige verlore momentum en skade,” sê Fergus Ferguson, voorsitter van Pretoria Sakekamer.

Daar is by ons geen twyfel dat dít wat nou in Pretoria afspeel, die resultate van nasionale politieke speletjies en spannning tussen individue binne die partye in die Regering van Nasionale Eenheid (RNE) is nie.

“Besighede bloei plaaslik, weens die arrogansie van partye op nasionale vlak en die ekonomie gaan uiteindelik die prys betaal.”