Pretoria Sakekamer en Tshwane Metroraad gaan samewerkingsooreenkoms sluit

Pretoria Sakekamer en die bestuur van die Tshwane Metroraad beplan om binnekort ‘n formele samewerkingsooreenkoms te finaliseer. Dié ooreenkoms sal ‘n vaste forum skep waardeur sakelui gekoördineerd en georganiseerd sake by die stadsbestuur kan aanmeld. Dit sal ook ‘n georganiseerde kanaal wees waardeur besluite meer effektief uitgevoer kan word.  Dié aankondiging was die uitkoms van ‘n korporatiewe aandete wat Maandagaand 22 Junie 2023  by die Centurion Golflandgoed deur die Pretoria Sakekamer aangebied is.

Meer as 60 senior sakelui van Pretoria het die geleentheid bygewoon, waar hulle deur die burgemeester, Cilliers Brink en die hoof van gemeenskapsveiligheid en die Tshwane metropolisie, mnr. Grandi Theunissen, toegespreek is.

Dit is in belang van Pretoria Sakekamer se lede wat met die betaling van belastings en heffings na alle waarskynlikheid van die grootste bydraes tot die stadskoffers lewer, dat daar  gereeld openhartige gesprekke met die stadsbestuur gevoer word. Sodanige gesprekvoering het onder al die partye byval gevind en is deur Brink ondersteun.

“Ons munisipaliteit is in ‘n kritieke toestand, maar daar is soveel kundigheid, hulpbronne en dryfkrag wat ons deur samewerking kan ontsluit. Die gemeenskap, besigheidsinstellings en burgerlike samelewing is nie ons vyand nie, hulle is ons bondgenote,” was Brink se inleiding tot die gesprek.

Brink het gesê hy dat hy inkoop by die visie van Pretoria Sakekamer. “My visie is om ‘n plek te skep waarheen mense wil terug trek van die Kaap af. Terug van oorsee af. ‘n Veilige voorspoedige tuiste waar elke inwoner ‘n aandeel in die toekoms het. Ek stem saam met die Sakekamer se visie. Ons kán Pretoria herbou en vestig tot ‘n wêreldklas sakekern.”

Volgens Fergus Ferguson, die voorsitter van Pretoria Sakekamer is dié instelling se oproep aan sakelui in Pretoria eenvoudig: Word rentmeesters van die stad. “As elke onderneming verantwoordelikheid neem vir die opknapping en verbetering van die area in die onmiddellike omgewing van hulle besighede, gaan dit reeds ‘n groot stap in die regte rigting wees. Groot verandering begin met klein treetjies. Brink het hierdie beginsel beaam en verwys na die “Adopt a Spot”-bywet wat reeds vir kleinskaalse omgewingsverbeterings voorsiening maak. Met die sakekamer se voorneme om sakelui ook op ‘n groter vlak te organiseer het Brink die vestigting van interne diensleweringsdistrikte as voertuig voorgestel om beheer van dienste en toegang in spesifieke geografiese areas self te bestuur.

Ferguson het beklemtoon dat Pretoria Sakekamer ‘n belangrike rol gaan speel om kenners wat spesialisadvies aan die Tswhane-bestuur kan verskaf in advieskomitees byeen te bring. Brink het spesialisadvies verwelkom en die Rooiwal-kragstasie as ‘n belangrike projek uitgesonder waar sakelui en die Tshwane Metrobestuur saam ‘n lewensvatbare model moet ontwikkel om bykomende krag vir die stad op te wek.

“Die verkoop van krag was tot twee jaar gelede die tweede of derde grootste inkomstestroom van enige munisipaliteit. Vandag verkoop Tshwane krag teen ‘n verlies weens die effek van beurtkrag op piektye. Ons moet ‘n manier vind om ons inkomste uit kragverkope te herstel, ondernemings en inwoners van Pretoria teen toenemende vlakke van beurtkrag te beskerm én minder afhanklik van Eskom te wees,” volgens Brink.

Verskeie gaste en lede van Pretoria Sakekamer by die geleentheid het kans gekry om hulle vrae en kommernisse met Brink te deel. Van die knelpunte wat genoem was, is toenemende uitdagings in die konstruksiebedryf vir die goedkeuring van ontwikkelings en bouplanne en kommer oor groot begrotingstekorte vir noodsaaklike infrastruktuurprojekte soos die herstel van die Rooiwal waterwerke en sinkgate in Centurion.

Pretoria Sakekamer en die Tshwane Metrobestuur sal voorts gereeld vergader om knelpunte wat deur lede van Pretoria Sakekamer aangemeld word, te hanteer. Dit sluit ook die nodige toestemmings vir verbeteringsprojekte in. Brink het beaam dat alles gedoen sal word om dié proses te vergemaklik. “En indien daar ‘n bywet is wat in die pad van hierdie tipe projekte staan, is ons nou in die posisie om dit te verander omdat die koalisie-regering wat nou aan die stuur van die Tshwane Metroraad is, vir die eerste keer sedert 2016 ‘n meerderheidstem in die Metroraad het.

“Almal was verheug to die ANC-burgemeester in 2016 uit die kussings gelig is in Pretoria. Maar die koalisievennote was steeds ‘n minderheid in die metroraad. Sonder ‘n meerderheidstem kan die Tshwane-bestuur nie eers ‘n bestuurder aanstel nie. Wat nog van wetswysigings en begrotingsaanpassings. Die gevolg was dat enige pogings om korrupte amptenare uit te werk en finansiële prosesse hersien te kry lamgelê is.”

Noudat die huidige bestuur ook oor die meerderheidstem beskik, kon groot vordering gemaak word. “Al die senior bestuursposisies word nou nuut, as permanente aanstellings geadverteer. Dit is ‘n besonderse geleentheid om bevoegde mense in die regte posisies te plaas.”

Pretoria Sakekamer het hierdie verwikkelinge verwelkom omdat dit sal help om korrupsie en wanprestasie teen te werk en beter samewerking sal versnel.