Pretoria Sakekamer kap Randwater oor boelietaktiek om voorgeskrewe interdepartementele geskilproses te omseil

Pretoria Sakekamer waarsku dat beide Randwater en die Tshwane munisipaliteit op dun ys beweeg en hulle oopstel vir regsaksie indien hulle nie hul voortslepende geskille oor watervoorsiening en -betalings oplos nie. Pretoria Sakekamer wys beide partye op die voorgeskrewe interdepartementele proses, ingevolge die Wet op Interregerings- Fiskale Betrekkinge (Wet No. 97 van 1997) wat gevolg moet word. Dat dié proses gevolg moet word, is reeds deur die Resilient-uitspraak in die Konstitusionele hof bevestig.

“Beide Randwater en die munisipaliteit moet kennis neem dat die skade wat sakelui in Pretoria weens die waterkrisis ly, nie verder geduld kan word nie. Die partye moet die voorgeskrewe riglyne van die wet volg en ophou om betalende watergebruikers gyselaar te hou. Beide partye loop die risiko om groot regskoste op die hals te haal. Op die keper beskou, kan so iets nie deur enige van die partye bekostig word nie en is dit in belang van almal dat die voorgeskrewe prosesse onmiddellik gevolg word,” sê Fergus Ferguson, voorsitter van die Pretoria Sakekamer.

Dit volg op die jongste verklaring deur Pretoria burgemeester Cilliers Brink dat swak kommunikasie en gebrekkige kennisgewings van Randwater veroorsaak dat die Tshwane stadsbestuur nie voldoende kan beplan of voorberei vir wateronderbrekings deur Randwater nie.

Wateronderbrekings is sedert Augustus verlede jaar byna ’n maandelikse verskynsel in Pretoria en dit blyk al meer dat die gebrekkige kommunikasie oor en onvoldoende redes vir die wateronderbrekings ’n boelietaktiek deur Randwater is om druk te plaas op Tshwane munisipaliteit oor hulle agterstallige waterrekening van minstens R544 miljoen.

“Randwater moet hulle kommunikasie met die Tshwane munisipaliteit regstel. Terwyl Pretoria voorverlede week bykans geen kennis gekry het van die wateronderbrekings wat sou volg nie, versuim Randwater steeds om tydige waarskuwing of redes vir voortslepende wateronderbrekings in Pretoria te gee.”

Pretoria Sakekamer doen ‘n beroep op die Minister van water en sanitasie, Senzo Mchunu, om in te gryp en ‘n kommissie van ondersoek aan te stel om die werklike redes van die waterprobleme in Pretoria vas te stel.