Pretoria Sakekamer nader stadsbestuur nadat “allokering” van koopkragbetalings agter raak

Die Pretoria Sakekamer het vandag ‘n dringende kennisgewing aan die stadsbestuur van die Tshwane-munisipaliteit gerig om in te gryp, nadat dit aan die lig gekom het dat talle sakelui en inwoners met Tshwane-koopkragmeters moontlik kragloos gelaat kan word weens agterstande in die allokering van koopkragbetalings. Bykomende druk weens die stad se finansiële jaareinde is vir die agterstand blameer.

Op ‘n navraag deur ‘n Pretoria Sakekamer-lid, het ‘n Tshwane-werknemer dit laat blyk dat betalings wat sedert 29 Junie vir koopkrag gedoen is, nog nie geallokeer is nie. Dit is onverstaanbaar dat ‘n stad soos Tshwane se stelsels nie geoutomatiseer blyk te wees nie. Die moontlike gevolg is dat besighede en inwoners wie se krageenhede tans laag is, se kragtoevoer moontlik onderbreek sal word indien die allokeringsprobleem teen daardie tyd nog nie opgelos is nie, met groot skade en verliese vir ondernemings.

Volgens Fergus Ferguson, voorsitter van die Pretoria Sakekamer is die kwessie vandag deur een van die sakekamer se lede aan die Pretoria Sakekamer gerapporteer en dit is dadelik ge-eskaleer. “Ons doen ‘n beroep op enige onderneming in Pretoria om dringend hulle krageenhede na te gaan en indien hulle vermoed dat hulle deur hierdie probleem geraak kan word, die Pretoria Sakekamer per e-pos (moira@pretoriasake.co.za) daarvan in kennis te stel.”

“Hoewel die Pretoria Sakekamer net lof het vir die stadsbestuur se pogings om agterstallige rekeninge in te vorder, kan sakelui en inwoners wat betaal vir krag beslis nie in die donker gelaat word tot die allokerings gedoen is nie.