Pretoria Sakekamer oor “National Shutdown”: Neem standpunt in - bly oop!

Sakelui moet nie ag slaan op die EFF se dreigemente oor die nasionale betoging wat vir 20 Maart 2023 beplan word nie en bloot standpunt inneem deur met hulle normale bedrywighede voort te gaan.

“Die heil van ons stad en die land lê nié in politieke partye nie, maar in entrepreneurs wat uitdagings in geleenthede omskep en verantwoordelikheid neem vir die uitdagings in ons omgewing,” sê Pretoria Sakekamer-voorsitter, Fergus Ferguson.

“Ons kort nie ‘n beter staat of regering nie. Ons moet werk aan ‘n beter sakeomgewing. As ons dít doen, sal politici selfs meer irrelevant raak as wat hul reeds is. Dit is sakelui wat hierdie land laat werk. Sakelui moet hulle bates, belange en personeel se inkomste beskerm. Doen dit deur jou besigheid te bedryf en risiko’s wat ontstaan te bestuur.”