Pretoria Sakekamer stel Publiek-Private Vennootskap voor om Wonderboom Lughawe se toekoms te verseker

Pretoria Sakekamer het gisteraand, tydens die Tshwane Metroraad se openbaredeelname-sessie in Pretoriuspark, sy insette oor die beoogde Wonderboom Nasionale Lughawe Meesterplan ingedien. Die sakekamer doen ‘n beroep op besluitnemers om daadwerklike hervormings en ‘n strategiese Publiek-Private Vennootskap (PPV) te implementeer, om die lughawe se volhoubaarheid en ekonomiese bydrae tot Pretoria te verseker.

Dis alombekend dat die Stad nie ‘n volhoubare bestuursmodel vir die lughawe kon volhou nie. Vir jare is verskeie intervensies van stapel gestuur en konsultante aangestel, sonder enige wesenlike sukses. Pleks daarvan om die kernprobleme van Wonderboom aan te spreek, het hierdie pogings slegs tot die vermorsing van belastingbetalers se geld gelei. Weens gedesentraliseerde beheer kon die lughawe nie sy eie sake onafhanklik bestuur nie, wat dit in ‘n permanente toestand van onsekerheid en ondoeltreffendheid gelaat het.

Pretoria Sakekamer is van mening dat ’n PPV die enigste realistiese oplossing is om privaatbeleggers te lok, kommersiële dissipline daar te stel, en volhoubare bedrywighede te verseker. Die sukses van Lanseria Internasionale Lughawe is ‘n beduidende voorbeeld dat ‘n goed gestruktureerde PPV – pleks van ‘n munisipale entiteit – die beste bedryfsmodel is vir Wonderboom. ‘n Munisipale entiteit sou steeds belemmer word deur die Stad se burokrasie, stadige verkrygingsprosesse en ‘n beperkte vermoë om privaatkapitaal te bekom. Daarenteen sal ‘n PPV die lughawe in staat stel om te floreer sonder om ‘n las op die Stad se begroting te wees, terwyl dit doeltreffend bestuur word en volgens internasionale lugvaartstandaarde funksioneer.

Benewens bestuurs- en beleggingskwessies, het Pretoria Sakekamer ook voorgestel dat Wonderboom herskep word as ‘n gespesialiseerde vrag- en vliegopleidingsentrum, en nie om met Lanseria te kompeteer vir die passassiersmark nie. Die wêreldwye aanvraag na vraglogistiek groei sterk, en Suid-Afrika se alombekende lugvaartopleidingsbedryf bied ‘n duidelike geleentheid vir volhoubare uitbreiding. Wonderboom huisves alreeds verskeie vlugskole, en met die regte kapitale insette, kan dit ontwikkel as ‘n toonaangewende sentrum vir vlieënieropleiding, vliegtuigonderhoud en logistieke operasies.

Kritieke infrastruktuur- en energiesekerheid vereis ook onmiddellike aandag. Die opgradering van die K97-pad moet dringend versnel word om toegang tot die lughawe te verbeter. Wonderboom moet ook opgeneem word in die Tshwane-bestuur se Rooiwal Kragstasie-heraanvangsplan om betroubare kragvoorsiening te verseker. Sonder hierdie beleggings sal die lughawe se potensiaal as sleutelrolspeler in die streek se

ekonomiese groei verlore gaan.

Wonderboom het die potensiaal om ‘n ekonomiese kragbron vir Pretoria te wees, maar slegs as daadwerklike stappe nou geneem word. Die Stad moet wegbeweeg van onsuksesvolle intervensies en eerder ‘n vennootskapsmodel daarstel wat ‘n volhoubare toekoms vir die lughawe sal verseker. Pretoria Sakekamer is gereed om verdere gesprekke aan te knoop en sal voortgaan om oplossings te bevorder wat die breër sakegemeenskap van Pretoria bevoordeel.