Pretoria Sakekamer versoek skakelforum met Tshwane bestuur - 'n belangrike eerste stap tot deursigtigheid en verantwoordbaarheid

Die Pretoria Sakekamer het vandag die eerste tree gegee om ‘n staande skakelforum tussen die sakegemeenskap en munisipale bestuur in Pretoria te vestig. In ‘n brief aan die burgermeester en munispale bestuurder het die Pretoria Sakekamer onder meer onderneem om die openbare deelnameproses oor die Tshwane-begroting van die sakegemeenskap se kant te help fasiliteer.

“Ons is positief dat die huidige rigting van inisiatiewe die aangewese manier is tot verbeterde samewerking tussen die stadsbestuur en die sakegemeenskap in Pretoria. Nieteenstaande, het die onlangse leierskapstruwelinge die noodsaak van permanente forums wat nie deur skielike leierskapveranderings omvergewerp word nie, beklemtoon.

‘n Permanente skakelforum tussen die Pretoria Sakekamer en die munisipaliteit se bestuur is belangrik, maar nie die hele oplossing nie. Ons glo dat ‘n kultuur van korporatiewe bestuur nodig is in die munisipaliteit. As gesoute besigheidseienaars kan ons konstruktiewe advies gee, maar as beleggers in die stad gaan ons knelpunte rondom dienslewering, ekonomiese groei, werkskepping, logistiek, veiligheid en die instandhouding van infrastruktuur help identifiseer, uitlig en oplos.

Die Pretoria Sakekamer gaan ‘n voertuig te wees wat droom oor die toekoms van die stad en wakker lê oor die uitdagings. Ons is hier om te bou, maar ons is ook hier om te stuur na verantwoordbaarheid. As beleggers in hierdie stad – deur ons besighede, maar ook as belastingbetalers, wil ons sien dat finansiële bestuur, dienslewering, tenderprossesse rondom infrastruktuurontwikkeling en misdaadbekamping geprioritiseer word terwyl ons self voor ons eie deure konstruktiewe projekte pak wat Pretoria beter sal maak.