Pretoria se mense, sy sport en sy sakeleiers – saam bou ons kultuur, karakter en groei

Wanneer jy vir Willem Strauss, president van die Blue Bulls Rugbyunie, aan die woord hoor, besef jy gou dat rugby vir hom veel meer is as net ’n spel – dit is ’n ekonomiese en kulturele krag, ’n bousteen vir gemeenskap en karakter, en ’n lewende metafoor vir hoe besigheid behoort te funksioneer.

Strauss, wat sedert 2018 aan die stuur van die unie staan, sê dit pragtig:“Rugby is te veel van ’n sport om dit net as ’n besigheid te bedryf – en te veel van ’n besigheid om net as ’n sport te bedryf.”

Dis hierdie balanseertoertjie tussen passie en volhoubaarheid wat Pretoria se sportkultuur uniek maak.

Die ekonomiese hartklop van Loftus

Min Pretorianers besef watter reuse-ekonomiese rol sport in hul stad speel. Loftus Versfeld, die tuiste van die Blou Bulle en sedert sowat vyf jaar ook die Mamelodi Sundowns, is nie net ’n sportarena nie – dit is ’n ekonomiese enjinkamer.

Sportgeleenthede op Loftus bring jaarliks tussen R1,7 en R1,8 miljard in die plaaslike ekonomie in. En elke toetsrugbywedstryd bring op sy eie sowat R700 miljoen se inkomste in.

Van restaurante en vulstasies tot slaghuise, drankwinkels en kleinhandelaars – elke wedstryddag is ’n besigheidsgeleentheid. “As die Bulle of die Sundowns wen, is die mense in Pretoria gelukkig,” sê Strauss met ’n glimlag, “en as hulle gelukkig is, spandeer hulle geld.”

Maar, voeg hy by, dit gaan nie net oor geld nie. Die aandeelhouers se harte is op die regte plek – hulle glo in die kulturele waarde van sport. Sport vorm mense, bring hulle saam en skep trots in ’n stad.

Meer as talent – dit gaan oor inspanning en kultuur

Vir Strauss is daar een beginsel wat elke speler, bestuurder en sakeman behoort te verstaan: “Inspanning oortref talent 100% van die tyd – en kultuur oortref strategie.”

Hy glo dat die verskil tussen sukses en middelmatigheid lê in mense se gesindheid, nie hul talent nie.

“Uiteindelik gaan dit oor die kwaliteit van die mense en die kultuur wat hulle saam skep wat die uitkoms bepaal.”

Dis hier waar die lesse van sport direk na besigheid vertaal kan word. ’n Span met ongelooflike talent maar swak kultuur sal nooit volhoubare oorwinnings behaal nie. Maar ’n groep mense wat bereid is om saam te werk, op te offer en rentmeesterskap te leef, sal oor tyd iets bou wat standhou.

Strauss se woorde het by die Pretoria Sakekamer diep weerklank gevind. Want dit is presies wat die sakekamer nastreef – om ’n netwerk van sakelui te wees wat die inspanning insit en ’n kultuur van rentmeesterskap kweek; wat verstaan dat ware groei spruit uit samewerking, nie selfverheerliking nie.

Die uitdagings – en die pad vorentoe

Soos in besigheid, is daar ook uitdagings in sport. Misdaad, sê Strauss, is ’n toenemende bedreiging – sindikate teiken groot wedstryde en steel honderde selfone per aand. Die ekonomie en hoë brandstofkoste beïnvloed ook bywoning: “Mense ry nie meer so ver om rugby te kyk nie – dis duur en onveilig om snags terug te ry.”

Tog bly sy geloof in die mense van Pretoria onwrikbaar. Hy sien elke wedstryd, elke gemeenskapsinisiatief en elke jong speler as ’n belegging in die stad se siel. Rugby, sê hy, “trap diep spore wêreldwyd.” Maar die diepste spore is die wat in mense se harte en gemeenskappe gelaat word.

Soos op die veld, geld dieselfde in besigheid:

Om te bou, moet jy bereid wees om op te offer.

Om te wen, moet jy bereid wees om saam te speel.

En om volhoubaar te groei, moet jy ’n kultuur kweek wat groter is as enige strategie.