Toerisme in Pretoria: Bou op ons bates, skep nuwe moontlikhede

By Pretoria Sakekamer se maandelikse netwerkgeleentheid in September, het twee gassprekers die kollig laat val op die potensiaal van toerisme in ons stad. Susan Marais, voorsitter van die Tshwane Tourism Association (TTA) en stigter van die Pretoria Bucket List, en Cilliers Brink, leier van die DA in die Tshwane-metro, het hul perspektiewe gedeel oor hoe Pretoria toerisme kan benut as ’n enjin vir groei en gemeenskapsbou.

“Toerisme is nie net vir toeriste nie”

Susan Marais, self ’n sakevrou en eienaar van vier ondernemings, dien al agt jaar op die TTA en die afgelope agt maande as voorsitter. Sy beklemtoon dat die Toerismeraad, wat tussen 200 en 300 ondernemings verteenwoordig, gedra word deur passievolle mense en sterk vennootskappe.

“Pretoria is nie net ’n plek om te besoek nie, dit is ’n stad om in te leef, om ’n gesin en ’n besigheid te bou,” sê sy. Met veldtogte soos “Wildest Capital in the World”, wat Pretoria se unieke posisie uitlig as die enigste hoofstad ter wêreld met die Groot Vyf binne sy metrogrense, wil die TTA die stad as ’n wêreldklas bestemming vestig.

Marais wys ook op die belangrikheid van veiligheid en die TTA se “Safest Capital”-veldtog, asook die waarde van gemeenskapsbydraes en spanontwikkeling – kernkriteria tydens die eerste Tshwane Tourism Awards wat in Augustus plaasgevind het.

Drie gedagtes oor toerisme – Cilliers Brink

Cilliers Brink het die gesprek verder gevoer met drie kernpunte oor toerisme in Pretoria:

1. ’n Kopskuif oor posisionering

Pretoria moet nie net op binnelandse besoekers fokus nie, maar doelbewus mik na die groeiende middelklas van Amerika, China en Europa. “Ons grootste mededingers vir internasionale aandag is Kaapstad en die Krugerwildtuin,” het hy gesê. “Daarom moet ons Pretoria vestig as ’n hoofstad met geskiedenis, monumente en kultuur – bates soos die Voortrekkermonument, Kerkplein en die Uniegebou.”

2. Skoner en veiliger toerisme-omgewings

Toerisme-aantreklikhede moet skoon en veilig wees. Brink het verwys na City Improvement Districts (CIDs) soos Hatfield, as voorbeelde van hoe orde en sekuriteit bevorder kan word. “As ons kulturele bates moet werk, moet hulle skoon en toeganklik wees.”

3. Ontginning van munisipale bates

Hy beklemtoon dat die stad sy eie toerismebates beter moet benut, soos die Wonderboom Nasionale Lughawe en die stad se natuurreservate en oorde. Hy glo die lughawe kan aansienlik verbeter word deur dit deur spesialisbestuur te laat bedryf.

Pretoria se potensiaal

Beide sprekers stem saam dat Pretoria ’n stad vol moontlikhede is – met unieke natuurlike, kulturele en historiese bates wat toerisme tot een van die belangrikste dryfvere vir groei kan maak.

“Ons leef in die hier en nou – dit is waar ons moet bou en ondersteun, sodat ons vir ons kinders ’n stad kan laat waarin hulle kan groei,” het Marais afgesluit.

Met die regte leierskap, samewerking en strategiese fokus, het Pretoria die potensiaal om homself te vestig as nie net die “Wildest Capital” nie, maar ook een van die mees dinamiese, inklusiewe en gesogte toerismebestemmings in Afrika.