Tshwane Burgemeester moet sekerheid bied rondom salarisverhogings

Die Pretoria Sakekamer neem kennis van die Pretoria Burgemeester, Rdl Nasiphi Moya se terugvoer vandag rondom die stad se finansiële situasie, maar ons bly bekommerd oor die blywende risiko wat ‘n moontlike skikking rondom die salarisverhogings vir die stad se finansies en dienslewering sal inhou.

Volgens Burgemeester Moya het die stad ‘n skikkingsooreenkoms rakende R6,67 miljard se skuld aan Eskom bereik. Dienooreenkomstig kan Tshwane munisipaliteit die uitstaande skuld oor ‘n periode van vyf jaar vereffen, mits alle lopende rekeninge binne 30 dae betaal word.

Al mag hierdie skuldooreenkoms ‘n sekere mate van verligting vir die Stad se finansies en kontantvloei inhou, bly die onopgelosde kwessie van salarisverhogings aan stadsamptenare steeds kommerwekkend.

Die verhogings, wat in 2021deur die bedingsraad vir plaaslike owerhede toegstaan is, was in die 2021/22 en 2023/24 finansiële jare deur die DA-koalisieregering geweier, omdat dit as onbekostigbaar beskou was.

In die aanloop tot en tydens Cilliers Brink en die DA-geleide koalisieregering se verwydering in Oktober, het Burgemeester Moya en haar Action SA party se ANC- en EFF-koalisievennote luidrugtig aangekondig dat die 3,5% (2021/22) en 5,4% (2023/24) verhogings aan amptenare betaal sou word.

Vandag se aankondiging dat die Stad in November die Arbeidshof gevra het om die Stad se finansiële verknorsing in ag te neem en om nie die verhogings toe te staan nie, is dus in lyn met die DA-geleide koalisieregering se oorspronlike vertoë en in teenstelling met die retoriek van ASA se Herman Mashaba en Michael Beaumond.

Pretoria het van Augustus tot Oktober 2023 ‘n gewelddadige werkerstaking beleef, wat dienslewering feitlik heeltemal tot stilstand gebring het. Burgemeester Moya en haar koalisievennote staar nou dieselfde risiko in die gesig omdat militante unielede moontlik haar aankondiging as ‘n gebreekte belofte mag beskou.

Burgemeester Moya en haar koalisievennote moet so spoedig moontlik sekerheid rondom die salariskwessie aankondig, want Pretoria se inwoners verdien ‘n Stadsregering wat hulpbronne doeltreffend aanwend om gehalte dienste te lewer.