Water- en rioolkrisis in Klerksoord versleg, ondanks noodkontrak van R17miljoen om herstelwerk te doen - Pretoria Sakekamer

‘n Omgewingskrisis dreig  in die Klerksoord-omgewing in die Noorde van Pretoria nadat dit aan die lig gekom het dat die kontrakteur aan wie ‘n noodkontrak van tussen R15miljoen en R17mijloen goedgekeur is, geensins ‘n impak maak op die krisis nie tenspyte van pogings wat aangewend word. Inteendeel blyk dit dat die krisis net vererger en dat die riool direk in ‘n stormwaterkanaal afloop, vanwaar dit by natuurlike rivieraflope aansluit en eindelik in die Bon Accorddam  beland.

Tydens die Pretoria Sakekamer se besoek aan die omgewing verlede week, het dit geblyk dat ‘n rioolstelsel wat oor 3,6km strek, maande lank al heeltemaal verstop is. Dit het veroorsaak dat die rou riool oral opstoot en oorstroom. Pleks dat die groot probleem gepak word, word daar telkens net plek-plek waar die ergste riooloorstromings is, spreekwoordelike pleisters oor die probleem geplak.

“Die feit dat daar geen aksie geneem word om die  rioolvuil  wat direk in die stormwaterkanale vloei te stop nie, is kommerwekkend. Met die lae watertafel in die omgewing, is daar reeds ‘n omgewingskrisis in die Klerksoord-omgewing, maar dit versprei nou verder tot moontlik in Bon Accorddam. Tydelike oplossings wat nou aangewend word, is om  die strome rioolvuil deur middel van slote na ‘n nabygeleë veld te herlei om dit uit die strate en sakepersele te hou,” verduidelik Christo Bester, woordvoerder van die Pretoria Sakekamer.

Die Pretoria Sakekamer het ná die besoek in Klerksoord ‘n dringende vergadering met lede van die stadsbestuur gehou en foto’s en videomateriaal verskaf waaruit die omvang van die krisis duidelik blyk. Die Sakekamer sal die burgemeester, Cilliers Brink môre (Vrydag, 28 Julie) 15:00 na die area vergesel.

“Ons besef dat die watertoestand in die hele Pretoria eintlik in ‘n noodtoestand verkeer, maar in gevalle waar omgewingsbesoedeling weens infrastruktuurineenstortings plaasvind, is daar sterk regspraak teen munisipaliteite wat dit  nie prioritiseer nie. In Mei 2022 is Rand West City Munisipaliteit met R10 miljoen beboet weens rioolvuilbesoedeling. So onlangs soos Junie 2023 is die Lekwa munisipalteit met R70 miljoen beboet vir soortgelyke oortredings.”